प्रार्थना गर्न भेला भएकाहरूमाथि आक्रमण, सात जना मारिए

एजेन्सी: पूर्वी जेरुसेलममा प्रार्थना सभाका लागि भेला भएका श्रद्धालुमाथि एक प्यालेस्टिनी बन्दुकधारीले आक्रमण गर्दा सात जना मारिएका छन्। सोही घटनामा तीन जना घाइते भएका छन्।

नेभ याकोभस्थित प्रार्थनास्थलमा शुक्रबार राति भएको आक्रमणलाई ती बन्दुकधारीले आतङ्कवादी हमला भनेका छन्।

इजरायलका प्रहरी आयुक्त कोबी शाब्ताईले उक्त आक्रमण हालैका वर्षमा भएका हमलामध्ये सबैभन्दा भीषण भएको बताएका छन्। हमलामा एक जना ७० वर्षीया महिलाको पनि ज्यान गएको छ।

इजरायली सुरक्षाकर्मीले आक्रमणकारीलाई गोली हानेर मारिसकेका छन्। प्यालेस्टिनी लडाकू समूहले आक्रमणको प्रशंसा गरे पनि त्यसको जिम्मेवारी लिएको छैन।

उक्त समूहले पश्चिम किनारा र गाजापट्टीमा मिठाइ बाँडेर खुशीयाली साटासाट गरेको थियो। पश्चिम किनारामा इजरायलले गरेको सुरक्षा कारबाहीमा नौ जना प्यालेस्टिनी मारिएको अर्को दिन उक्त आक्रमण भएको हो।

अमेरिकी विदेशमन्त्री एन्टोनी ब्लिङ्केनको भोलि आइतबार हुने भ्रमणको पूर्वसन्ध्यामा भएको यो घातक हमलाले पश्चिम एसियाको सुरक्षामा संशय थपेको छ। अमेरिकाले आक्रमणको निन्दा गर्दै त्यसलाई सभ्य समाजविरुद्धको हमला भनेको छ।

साथै उसले इजरायललाई उसको सुरक्षा व्यवस्थालाई सुदृढ तुल्याउन सहयोग गर्ने प्रतिबद्धता व्यक्त गरेको छ। शुक्रबार नै राष्ट्रपति जो बाइडेनले प्रधानमन्त्री बेञ्जामिन नेतान्याहुलाई फोन गरेर इजरायलका पक्षमा अमेरिका रहेको बताउँदै आक्रमणमा मारिएकाहरूप्रति श्रद्धाञ्जलि व्यक्त गरेका थिए।

१४ माघ, २०७९, १३:२१:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।