उकेरा अर्थ

चीनको सीमा बन्द हुँदा मुस्ताङको महँगो च्याङ्ग्रा किन्नुपर्ने बाध्यता, एउटैको मूल्य ५० हजारसम्म


पोखरा: दशैंको लागि पोखरामा मुस्ताङबाट भेड च्याङ्ग्रा भित्रिन थालेको छ। मुस्ताङको उपल्लो भेग, डोल्पा, बझाङ र हुम्लाबाट भित्रने गरेका व्यापारीहरूले हप्तौँ लगाएर ल्याएर पोखराको लुम्ले, हेमजा र आसपासका क्षेत्रमा राखेका छन्।

मुस्ताङबाट हिँडाएर व्यापारीले ल्याउँदै गरेका च्याङ्ग्राका बथान बाटोमा आउने क्रममा पनि छन्।

पोखरा र आसपासमा स्थानमा दशैंको समयमा खसी बोकाभन्दा च्याङ्ग्रा नै बढीजसो खाने चलन छ। पहाडी एवं तराई क्षेत्रमा पालिने खसी बोकाको तुलनामा हिमाली भेगमा पालिएको च्याङ्ग्रा स्वास्थ्यका हिसाबले पनि राम्रो हुने भएकाले पोखरामा वर्षमा एकपटक च्याङ्ग्राकै मासु खाने भन्ने चलन नै बसेको छ।

तर यस वर्ष पनि कोभिड–१९ का कारण चीनले सीमा जोखिम बढ्ने भन्दै कोरला लगायतका नाका बन्द गरेकाले तिब्बतबाट भेडा च्याङ्ग्रा भित्रिन पाएन। यसले मुस्ताङमा पालिएका च्याङ्ग्राको मूल्य ह्वात्तै बढेको छ।

पोखरा क्षेत्रमा झारिएका च्याङ्ग्रा प्रतिगोटा ३५ हजारदेखि ५० हजारसम्ममा बिक्री भइरहेको व्यवसायी कृष्ण अधिकारीले बताए। अधिकारीका अनुसार तिब्बतबाट ल्याउन नपाउँदा उपल्लो मुस्ताङमा पालिएका च्याङ्ग्रामा प्रतिगोटा ५ देखि १० हजार रुपैयाँ महँगिएको र पोखरासम्म ल्याउँदा विभिन्न ठाउँमा तिरिएको पटके करका कारण मूल्य बढेको हो।

पोखरादेखि जोमसोम पुगेर १५० वटा च्याङ्ग्रा खरिद गरी ल्याएका अधिकारीले अघिल्लो वर्ष मुस्ताङमा प्रतिगोटा ३० हजारसम्ममा खरिद गरेको च्याङग्रा यो वर्ष ३५ हजारदेखि ४० हजारसम्म तिर्नुपरेको बताए।

उनले भने, ‘गत वर्ष २५/३० हजार पर्ने च्याङ्ग्रालाई यस वर्ष मुस्ताङमै ७/१० हजार बढी तिर्नुपर्‍यो। पोखराादेखि जोमसोमसम्म जाँदाको खर्च र यहाँसम्म ल्याउँदा विभिन्न ठाउँमा तिरेको करसहितको खर्च जोड्दा विगतको भन्दा १०/१२ हजार बढी पर्छ।’

विगत डेढ दशकदेखि दशैंको बेला भेडा च्याङ्ग्राको व्यापार गर्दै आएका अधिकारीले यस वर्षको मूल्य अहिलेसम्मकै उच्च भएको बताए।

उच्च हिमाली क्षेत्रमा चर्ने भएकाले पोखरासम्म सुरक्षित तरिकाबाट ल्याउन झण्डै १०/१५ दिन हिँडाएर भेडाच्याङग्रा ल्याउनुपर्ने बाध्यता रहेको छ। ट्रकबाट ल्याउँदा वातावरणको प्रभावले भेडा च्याङ्ग्रा मर्ने भएकाले ठाउँ ठाउँमा चराउँदै ल्याउँदा विस्तारै वतावरणसँग घुलमिल हुँदै जान्छन्।

भेडा च्याङ्ग्रा झारेसँगै व्यापारीहरूले पोखराको पुरानो टुँडीखेल, सिमपानी, याम्दी, हेमजा लगायतका ठाउँमा खोर बनाउने काम तीव्ररूपमा भइरहेको छ।

दशैंका बेला भेडाच्याङग्रा राख्नका लागि खोर बनाउँदै गरेका याम्दीका किशोर थापाले यस अवधिमा प्रतिखोर १५ देखि २० हजार भाडा लिने गरेको बताए।

मौसमअनुसार दिल्ली र काठमाडौंमा व्यापार गर्दै आएको भए पनि दशैंको बेला भने च्याङ्ग्राको व्यापार गर्ने घाँसाका दोर्जे गुरुङले बताए। उनले भने ,‘दुःख,कष्ट सहेर हप्तौं लगाएर ल्याउनु पर्ने भए पनि आफूले यही व्यापारबाट राम्रो फाइदा गर्दै आएका छु। योपाली के हुन्छ हेरौँ। विगत १० वर्षदेखि यो व्यवसाय गर्दै आएको छु।’

पोखराको हेमजामा च्याङ्ग्रा किन्दै गरेका यामबहादुर थापाले वर्षमा एकपटक उपल्लो भेगबाट झर्ने च्याङ्ग्राको मासु खाने इच्छाले च्याङ्ग्रा किन्न आएको बताए। खसीबोका, कुखुराको मासु नियमित खाए पनि हिमाली जडीबुटी खाएका च्याङ्ग्राको मासुको स्वाद र सन्तुष्टी लिन बर्सेनी च्याङग्रा किनेर खाने गरेको उनले बताए।

पोखरामा व्यापारीले अष्टमी र नवमीको दिनमा ठूलो संख्यामा च्याङ्ग्रा भित्राउने गर्दछन्। फूलपातीको दिनमा विशेषगरी च्याङ्ग्राको बिक्री ह्वात्तै बढ्ने गर्दछ। फूलपातीको दिन घरमा खसी, च्याङ्ग्रा काट्ने गरिन्छ। मुस्ताङबाट दुईतीन साता पैदल हिँडाएर व्यापारीले समूहमा च्याङ्ग्रा पोखरासम्म ल्याउने गर्दछन्।

पछिल्लो समय व्यापारीले च्याङ्ग्रा काठमाडौं, चितवन र बुटवल लगायत विभिन्न शहरहरूमा समेत पुर्‍याउँदै आएका छन्।

यो खबर पढेर तपाईलाई कस्तो महसुस भयो ?

सम्बन्धित समाचार

आइएमई पे र मेरो किरानाबीच १५ प्रतिशत छुट दिने सम्झौता  

मेरो किरानाको ‘महाबचत सेल विक’लाई लक्षित गरी ग्राहकका लागि अफर सार्वजनिक गरिएको हो। यसअन्तर्गत ग्राहकले मेरो किरानाको वेबसाइट वा एपबाट सामान खरिद गर्दा आइएमई पेबाट....

जगदम्बा इन्टरप्राइजेजले उद्योगको क्षमता विस्तार गर्न ४८ मेगावाट बिजुली लिने

फलाम र स्टिल उत्पादन गर्दै आएको उद्योगले क्षमता विस्तारका लागि प्राधिकरणबाट थप विद्युत् लिन लागेको हो। यसअघि कुल ४४ मेगावाट लिँदै आएकामा अब थप चार....

साप्ताहिक शेयर समीक्षा: भावी सरकारको आकलनले बजार तल-माथि

निर्वाचनअगाडि १९३६.८४ मा बन्द भएको नेप्से परिसूचक उक्त दिन ७.१३ अंकले घटेर १९२९.११ अंकमा कायम भयो। उक्त दिन कुल एक अर्ब ३५ करोड रुपैयाँको कारोबार....

स्मार्टच्वाइस टेक्नोलोजिज र सन्राइज बैंकबीच सम्झौता

सम्झौतापछि सन्राइज बैंकका ग्राहकले बैंकको मोबाइल बैंकिङ्ग एपमार्फत कुनै पनि वस्तु तथा सेवा खरिद गर्दा स्मार्ट क्यूआरबाट भुक्तानी गर्न सक्नेछन्। सम्झौतापत्रमा स्र्माटच्वाइस टेक्नोलोजिजबाट प्रमुख कायकारी....

काठमाडाैंका टाेल-टाेलमा विश्वकप फुटबल स्क्रिनिङका लागि सम्झाैता

सागर डिस्टिलरी ब्रान्डकाे राेयल ब्लूले विश्व कप खेलहरू विभिन्न स्थानमा प्रदर्शन गर्न काठमाडौंका विभिन्न युवा क्लबहरूसँग सम्झौता गरेको हाे। राेयल ब्लूले प्रदर्शन गरिने स्थानहरूमा अनुमान....