मार्किचोक सबस्टेसनमा प्राविधिक समस्या: तनहुँ, गोरखा र चितवनमा विद्युत् अवरुद्ध, वैकल्पिक व्यवस्थाको प्रयास जारी

तनहुँ : तनहुँको आँबुखैरेनी गाउँपालिका–२ स्थित मार्किचोक २२०/१३२/३३ केभी सबस्टेसनमा प्राविधिक समस्या आउँदा तीन जिल्लाको विद्युत् आपूर्ति प्रभावित भएको छ।

सबस्टेसनमा रहेको १३२/३३ केभी क्षमताको १२ एमभिए पावर ट्रान्सफर्मरको अर्थिङ प्रणालीमा खराबी आई अत्यधिक करेन्ट प्रवाह भएपछि हिजो साँझ ५:३२ बजेदेखि लाइन अवरुद्ध भएको हो।

नेपाल विद्युत् प्राधिकरण तनहुँ वितरण केन्द्रका अनुसार उक्त सबस्टेसनबाट तनहुँको आँबुखैरेनी, गोरखा जिल्ला तथा मुग्लिन हुँदै चितवनका केही क्षेत्रमा विद्युत् आपूर्ति हुँदै आएको छ।

समस्या समाधानका लागि पोखरा ग्रिड महाशाखाको प्राविधिक टोली खटिएको थियो। टोलीले राति १२:४५ बजे लाइन पुनः सञ्चालनमा ल्याए पनि फेरि अर्थिङ प्रणालीमै समस्या देखिएपछि आज बिहान ६:४७ बजे ट्रान्सफर्मर पुनः बन्द गरिएको तनहुँ वितरण केन्द्रका सूचना अधिकारी वेनी नेपालीले जानकारी दिए।

उनका अनुसार वैकल्पिक लाइनमार्फत विद्युत् आपूर्ति सञ्चालन गर्ने प्रयास भइरहेको छ। साथै, ट्रान्सफर्मर मर्मत गर्न सकिने अवस्था भए मर्मत गर्ने, अन्यथा आवश्यक परे ट्रान्सफर्मर नै परिवर्तन गर्ने तयारी गरिएको छ। हाल पोखरा ग्रिडको प्राविधिक टोली मार्किचोक सबस्टेसनमै रहेर मर्मत तथा व्यवस्थापनको कार्य गरिरहेको छ।