फिल्डमा भएको कामभन्दा बढीको मूल्यांकन गरेर सरकारी बजेटमा भ्रष्टाचार गरेको अभियोगमा मुद्दा दायर

काठमाडौं : अख्तियार दुरुपयोग अनुसन्धान आयोगले सरकारी बजेटमा भ्रष्टाचार गरेको अभियोगमा भेटरिनरी अस्पताल तथा पशुसेवा विज्ञ केन्द्र सर्लाहीका तत्कालीन निमित्त कार्यालय प्रमुख डा. सुनिलकुमार यादव लगायतका व्यक्ति विरुद्ध विशेष अदालतमा मुद्दा दायर गरेको छ।

सर्लाहीको चक्रघट्टा गाउँपालिका -९ गोइयाहीमा सञ्चालित आम्रपाली सहकारी संस्थालाई भेटेरिनरी अस्पताल तथा पशुसेवा विज्ञ केन्द्र मलङ्गवा सर्लाहीबाट आर्थिक वर्ष २०७५/०७६ मा कृषि सेड निर्माणका लागि उपलब्ध सरकारी बजेटमा भ्रष्टाचार भएको पाइएको भन्दै मुद्दा दायर गरिएको हो।

फिल्डमा भएको कार्यभन्दा बढीको मूल्यांकन गराई ९ लाख ७७ हजार १६ रूपैयाँ बराबरको भ्रष्टाचार भएको अभियोगमा निमित्त कार्यालय प्रमुख यादवलाई बिगो बमोजिमको कारवाहीको माग गरिएको छ।

यता, तत्कालीन योजना शाखा प्रमुख सुरेन्द्र महत्तो कोइरी विरुद्ध पनि समान बिगो दावी गरिएको छ।

आयोगका प्रवक्ता नरहरि घिमिरेका अनुसार चक्रघट्टा गाउँपालिका-९ का तत्कालीन वडा अध्यक्ष रामईश्वर ठाकुर, आम्रपाली बहुमुखी सहकारी संस्था लिमिटेडका अध्यक्ष मृगेन्द्रप्रसाद यादव, उपाध्यक्ष जयनारायण राय, व्यवस्थापक जयनन्दन राय यादव विरुद्ध पनि ९ लाख ७७ हजार १६ रूपैयाँ बराबरको बिगो दावी गर्दै मुद्दा दायर गरिएको हो।

१२ चैत, २०८०, १८:४३:५० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।