निर्वाचन सुरक्षा : हेलिकप्टरबाट पनि गस्ती गरिने

काठमाडौं : प्रतिनिधिसभा सदस्यको निर्वाचनमा देशैभरि हेलिकप्टरबाट पनि गस्ती गरीने भएकाे छ। 

गृहमन्त्री ओमप्रकाश अर्यालको अध्यक्षतामा बुधबार बसेको केन्द्रीय सुरक्षा समितिको बैठकले भोलि बिहीबार हुने चुनावमा हेलिकप्टरबाट पनि गस्ती गर्ने निर्णय गरेको हाे।

बैठकले संवेदनशील क्षेत्रमा हेलिकप्टरबाट गस्ती गर्ने, निर्वाचन विरोधी गतिविधि हुनसक्ने विषयमा सम्भावित सूचना संकलन गर्ने, कानून विपरितका गतिविधि भएको पाइएका कानून बमोजिम तुरुन्त कारवाही गर्ने लगायतका निर्णय गरेको छ।

गृह मन्त्रालयका सुरक्षा तथा समन्वय महाशाखा प्रमुख एवं प्रवक्ता आनन्द काफ्लेका अनुसार बैठकमा सबै सुरक्षा निकायबाट निर्वाचनको तयारीका सम्बन्धमा भएका कार्यको ब्रिफिङ लिइएको र सोही अनुरुप निर्वाचनको सुरक्षा तयारी पूरा भएको बैठकले निष्कर्ष निकालेको हो।

यस्तै, बैठकले निर्वाचनको सुरक्षा व्यवस्थापन चुस्त दुरुस्त बनाइएकाले सबैलाई निर्वाचनमा ढुक्क भएर मतदानमा सहभागी हुन आव्हान गर्ने निष्कर्ष समेत निकालेको छ।

बैठकमा गृहमन्त्री अर्याल, गृहसचिव राजकुमार श्रेष्ठ, रक्षा मन्त्रालयका सचिव केदारनाथ शर्मा, सुरक्षा निकायका प्रमुखहरु तथा गृहमन्त्रालयका उच्च अधिकारीहरुको सहभागीता रहेको थियो।