तीन क्षेत्रको ‘लाइफलाइन’ सडक, पाँच वर्षदेखि धुलो र हिलोमै अलपत्र

तुलसीपुर : दाङका तीन वटै निर्वाचन जोड्ने तुलसीपुर उपमहानगरपालिका-१४ जितपुरमा पर्ने दामोदर सडक खण्ड पाँच वर्षदेखि कालोपत्रे नहुँदा अलपत्र परेको छ।

घोराही तुलसीपुर-८ भैसापत्रामा क्षेत्र नम्बर २ जोडिन्छ भने घोराही-५ डाँगीगाउँमा क्षेत्र नम्बर १ जोडिन्छ। त्यस्तै, घोराही-८ निर्वाचन क्षेत्र नम्बर २ मा पर्छ भने घोराही-५ निर्वाचन क्षेत्र नम्बर १ मा पर्दछ। 

तुलसीपुर उपमहानगरपालिका-१४ निर्वाचन क्षेत्र नं ३ मा पर्छ। यसरी तीन वटा निर्वाचन क्षेत्रलाई जोड्ने र सोही ठाउँ हुँदै दाङको गौरवको योजनाका रूपमा रहेको दामोदर सडक खण्ड पाँच वर्षदेखि कालोपत्रे नहुँदा अलपत्र परेको हो।

घोराहीबाट बबई गाउँपालिकाको हापुरसम्म जोड्ने उक्त सडकले जोड्ने दामोदर खण्डमा कालोपत्रका लागि ग्राभेल हालेको पाँच वर्षभन्दा बढी भइसके पनि अहिलेसम्म कालोपत्रेसहित स्तरोन्नति हुन सकेको छैन।

उक्त सडकअन्तर्गत घोराहीको नैनवारसम्म भने कालोपत्रे भइरहेको स्थानीय बताउँछन्। यहाँबाट नजिकै पर्ने तुलसीपुर-१४ को जितपुरसहित १८ किलोमिटर क्षेत्रमा कालोपत्रे हुन नसकेको स्थानीय नारायण खड्काले बताए। 

“सोही वडाको बीचमा कालोपत्रे नभएर तुलसीपुर-११ को उरहरीतर्फबाट काम भएको छ। यसले यहाँका नागरिकलाई आवागमनमा सास्ती हुँदै आएको छ,” उनले भने।

वरिपरि सबै ठाउँमा कालोपत्रे भएको बताउँदै तुलसीपुर उपमहानगरपालिका-१४ जितपुर क्षेत्रमा सडक स्तरोन्नति नहुँदा यहाँका स्थानीयले आफूहरू उपेक्षामा परेको बताउने गरेका खड्काले उल्लेख गरे। 

दामोदर सडकलाई पश्चिम दाङ जोड्ने वैकल्पिक मार्गका रूपमा पनि लिने गरिएको छ। यो सडक निर्माण भएमा स्थानीय उत्पादन सहजै बजारसम्म लैजान सकिने उनले बताए।