जेनजी आन्दोलनका घाइतेको विवरण फागुन १५ भित्र पठाउन स्वास्थ्य मन्त्रालयको निर्देशन

काठमाडौँ : स्वास्थ्य तथा जनसङ्ख्या मन्त्रालयले 'जेनजी' प्रदर्शनका क्रममा घाइते भई विवरण छुट भएका व्यक्तिहरूको विवरण उपलब्ध गराउन सबै अस्पताल तथा स्वास्थ्य संस्थाहरूलाई निर्देशन दिएको छ।

स्वास्थ्य तथा जनसङ्ख्या मन्त्रालयका प्रवक्ता डा. प्रकाश बुढाथोकीका अनुसार, घाइतेहरूको उपचार र राहत वितरण प्रक्रियालाई प्रभावकारी बनाउन गठित समन्वय समितिको निर्णय अनुसार सबै स्वास्थ्य संस्थालाई निर्देशन दिएको हो। अस्पतालहरूले आगामी फागुन १५ गतेभित्र घाइतेको सम्पूर्ण विवरण मन्त्रालयमा पठाइसक्नुपर्नेछ।

मन्त्रालयका प्रवक्ता डा. बुढाथोकीले घाइतेहरूको सूचीकरण र वर्गीकरण पुनःवर्गीकरणसम्बन्धी कार्य समयमा सक्नका लागि यही फागुन १ देखि १५ गतेभित्र विवरण उपलब्ध गराउन भनिएको बताए। उनले फागुन १५ गतेभित्र आएका निवेदन उपर छानबिन गरी घाइतेको अन्तिम नामावली सार्वजनिक गरिने जानकारी दिए। 

मन्त्रालयका प्रवक्ता डा. बुढाथोकीका अनुसार अहिलेसम्म २०० जना घाइतेको मात्र वर्गीकरण विवरण उपलब्ध भएको छ। उनले जेनजी प्रदर्शनका क्रममा धेरै घाइते भए पनि सामान्य घाइते भएकालाई केही सुविधा उपलब्ध नहुने भएकाले पनि सम्पर्कमा नआएको हुनसक्ने बताए। 

सरकारले जेनजी प्रदर्शनका क्रममा अतिगम्भीर वर्गीकरणमा परेकालाई र ती घाइतेलाई स्याहार गर्नेलाई मासिक नौ हजार, गम्भीर घाइतेलाई मासिक नौ हजार र मध्यम घाइतेलाई मासिक चार हजार उपलब्ध गराउने निर्णय गरेको प्रवक्ता डा. बुढाथोकीले जानकारी दिए।

उनका अनुसार जेनजी प्रदर्शनका क्रममा दुई हजार ५९९ जना घाइते भएका मन्त्रालयको तथ्याङ्कमा उल्लेख छ ।