चुनावकाे कारण साैराहामा घटे पर्यटक, होटल व्यवसाय प्रभावित

चितवन : मुख्य पर्यटकीय मौसममै साैराहामा पर्यटककाे संख्या झण्डै आधाले घटेकाे छ। 

विगतका वर्षमा यतिबेला ८० प्रतिशत हाराहारीले भरिने सौराहाका होटल अहिले ५० प्रतिशतभन्दा कम मात्र बुक भएका छन्।

पर्यटकीय मौसममा समेत साैराहामा पर्यटक नआउँदा यहाँका व्यवसायीमा निरासा छाएको छ।

क्षेत्रीय होटल सङ्घ चितवनका अध्यक्ष ओमप्रकाश पाण्डेले फेब्रुअरी, मार्च र अप्रिल महिना सौराहाको मुख्य पर्यटकीय मौसम भएको बताउदै गत वर्ष यतिबेला होटलका ८० प्रतिशत कोठा भरिने गरेका उल्लेख गरे। साथै उनले यस वर्ष ५० प्रतिशतभन्दा कम कोठा बुक भएकाे बताए।

अध्यक्ष पाण्डेले भने, “एकदमै राम्रो पर्यटकीय याममा पनि किन पर्यटक आएनन् हामी सोचमग्न छौँ।”

यो बेलामा चितवन राष्ट्रिय निकुञ्जमा ढड्डी फाँडेर टाढासम्म देखिने भएकाले सजिलै वन्यजन्तु हेर्न सकिन्छ। मौसमका हिसाबले पनि गर्मी र जाडो दुबै नहुने भएकाले सबैका लागि उपयुक्त यही समय हो। सबै हिसाबले राम्रो भए पनि विदेशी पर्यटक न्यून मात्र आउँदा व्यवसाय प्रभावित भएको उनको भनाइ छ।

सौराहामा मात्र नभएर देशभरको अवस्था उस्तै रहेको अध्यक्ष पाण्डेले बताए। उनले भने, “पर्यटक नआउनुको कारण खोज्नुपर्ने भएको छ।”

सङ्घका उपाध्यक्ष गुणराज थपलिया निर्वाचनका कारण विदेशी पर्यटक नआउँदा सौराहामा पर्यटकको सङ्ख्यामा कमी आएको बताउछन्। निर्वाचनपछि पर्यटक बढ्ने उनकाे अपेक्षा छ।

होटल व्यवसायी सुमन घिमिरे निर्वाचनको मुखमै पर्यटकको आगमनमा कमी आएको बताउछन्। विशेष अवस्थामा निर्वाचन हुन लागेको उल्लेख गर्दै उनले अन्तरराष्ट्रिय जगतमा यहाँको अवस्था शान्तिपूर्ण छ भन्ने सन्देश पुग्न जरुरी भएको बताए।

युनाइटेड हात्ती सञ्चालन सहकारी संस्थाका अध्यक्ष दीपेन्द्र खतिवडा गत वर्ष यतिबेला दैनिक चार खेप गर्ने हात्तीले अहिले एक खेप मात्र गर्ने गरेको बताए। पर्यटकको आगमनमा कमी आएपछि व्यावसायिक रुपमा पालिएका हात्तीका सञ्चालक प्रभावित भएका छन्।

रेष्टुरेन्ट व्यवसायीसमेत रहेका खतिवडाका अनुसार पर्यटक नआएपछि सौराहाका रेष्टुरेन्टमा प्रत्यक्ष प्रभाव परेको छ। मुख्य मौसममा पर्यटक घटेपछि पर्यटकीय गतिविधिमा काम गर्ने समग्र व्यवसाय प्रभावित भएको उनले बताए।

बनबास रिसोर्टका महाप्रबन्धक प्रकाश न्यौपाने सौराहामा यो मौसममा पर्याप्त पर्यटक आउने भए पनि यस वर्ष कमी आएको बताए।

सौराहामा एक सय ४८ होटलमा सात हजार २०० पर्यटक अट्ने क्षमता छ। यस क्षेत्रमा प्रत्यक्ष रुपमा छ हजार ४०० जनाले रोजगारी पाएका छन्। अप्रत्यक्ष रोजगारी पाउनेको सङ्ख्या १२ हजारभन्दा बढी छ।

चितवन राष्ट्रिय निकुञ्ज र आसपासका सामुदायिक वनमा दुर्लभ एक सिङ्गे गैँडा, पाटेबाघ, घडीयाल गोहीलगायतका दुर्लभ वन्यजन्तु र चराचुरुङ्गी हेर्न स्वदेशी तथा विदेशी पर्यटक आउने गर्दछन्। यसका अतिरिक्त सौराहामा थारु संस्कृति पनि पर्यटकका लागि रुचिकाे विषय हाे। 

यस्तै भारतीय नागरिक बढी मात्रामा यहाँ आउने गरेका छन्।