अमेरिकी मध्यस्थतामा युक्रेन र रुसबीच वार्ता : जेलेन्स्कीले भने- 'प्रगति भयो, तर सम्झौता सहज छैन'

एजेन्सी : युक्रेन र रुसले जेनेभामा अमेरिकी मध्यस्थतामा भएको वार्तामा केही प्रगति भएको तर भूभागको मुख्य मुद्दामा कुनै सम्झौता नगरेको युक्रेनका राष्ट्रपति भोलोदिमिर जेलेन्स्कीले बुधबार बताएका छन्।

संयुक्त राज्य अमेरिकाले लगभग चार वर्षको युद्धको अन्त्यका लागि जोड दिइरहेको छ, जसले दशौं हजारको ज्यान लिएको छ र पूर्वी र दक्षिणी युक्रेनको धेरै भाग नष्ट गरेको छ, तर मस्को र किएभबीच युद्धपछिको सम्झौतामा कसले कुन जमिन पाउँछ भन्ने विषयमा विवाद छ।

रुसले कुनै पनि सम्झौताको एक भागको रूपमा युक्रेनको पूर्वी डोनेट्स्क क्षेत्रमा पूर्ण नियन्त्रणको लागि जोड दिइरहेको छ र यदि किएभ वार्ताको टेबलमा नआएमा बलपूर्वक लिने चेतावनी दिएको छ।

राजनीतिक र सैन्य रूपमा कमजोर युक्रेनले यो मागलाई अस्वीकार गरेको छ। रुसलाई फेरि आक्रमण गर्नबाट रोक्ने सुरक्षा सुनिश्चितता बिना सम्झौतामा हस्ताक्षर नगर्ने सङ्केत युक्रेनले गरेको छ।

“हामी देख्न सक्छौं, केही आधारभूत काम भएको छ, तर अहिले नै सम्झौतामा पुग्ने कुरा सजिलो छैन,” राष्ट्रपति जेलेन्स्कीले वार्ता सकिएपछि एएफपी लगायतका पत्रकारहरूलाई दिएको जानकारी मा उल्लेख छ।

उनले भने, “अमेरिकाको  मध्यस्थतामा दुवै पक्ष युद्धविराम अनुगमन संयन्त्रसँग सम्बन्धित ‘लगभग सबै मुद्दाहरू’ मा सहमत भएका छन्। यद्यपि, युक्रेनको पूर्वी क्षेत्रमा कब्जा गरिएको क्षेत्रको भविष्य र रुसको कब्जामा रहेको जापोरिज्जिया आणविक ऊर्जा संयन्त्रको भविष्यको स्थितिसँग सम्बन्धित संवेदनशील मुद्दाहरू समाधान हुन बाँकी रहेका छन्।”

रुसी प्रतिनिधिमण्डलका प्रमुखले वार्ता ‘कठिन’ भएको र भविष्यका लागि थप वार्ताको योजना बनाइएको बताए। रुसले सन् २०२२ फेब्रुअरीमा युक्रेनमाथि पूर्ण रूपमा आक्रमण सुरु गरेको थियो।

यस द्वन्द्वको परिणामस्वरूप युक्रेनले व्यापक रूपमा आफ्ना ऊर्जा क्षेत्र लगायतका भौतिक संरचनालाई गुमाएको छ भने हजारौं नागरिकको मृत्यु भएको छ र लाखौं मानिसहरू आफ्नो घर छोडेर भाग्न बाध्य भएका छन्।