३ वर्षमा नागढुङ्गा–मलेखु सडकको काम ३७ प्रतिशत मात्र, ६ महिना म्याद थप

चितवन : पृथ्वी राजमार्गअन्तर्गतको नागढुङ्गा–मलेखु सडकको काम तोकिएको समयभित्र सम्पन्न हुन नसक्दा ६ महिना म्याद थप गरिएको छ। सम्झौताअनुसारको सडक निर्माणकाे काम तीन वर्षमा ३७ प्रतिशत मात्र सम्पन्न भएको छ।  
    
विसं २०७९ पुस १५ गते तीन वर्षमा सम्पन्न गर्ने गरी यो सडक ठेक्का सम्झौता गरिएको थियो। मुग्लिङ–नागढुङ्गा खण्डलाई तीन चरण बनाएर बोलपत्र आह्वान गरिएको थियो । तेस्रो चरणको म्याद गत पुस १५ मा सकिएपछि छ महिनाका लागि म्याद थप गरिएको छ। 

नागढुङ्गा–मुग्लिङ सडक आयोजनाअन्तर्गत पश्चिम खण्ड मुग्लिङ–मलेखु सडकका इन्जिनियर विजय दरैका अनुसार डिजाइनको तथ्याङ्क गलत पर्दा सडकको नक्साङ्कन फरक परेकाले समयमा काम गर्न नपाएका कारण निर्माण कम्पनीलाई १८३ दिन म्याद थप गरिएको हो।
    
निर्माण कम्पनीले सडकको काम गर्ने ठाउँ खाली हुन ढिलाइ भएको, रुख, खम्बा सार्न समयमा नसकिएको, निर्माण सामग्री सहज पाउन नसकिएको, सवारीको उच्च चापलगायत कारण निर्माण तोकिएको समयमा हुन नसकेको जनाउँदै आएको छ।

दरैले अहिलेका लागि नक्साङ्कनका विषयलाई सम्बोधन गर्दै समय थप गरिएको भए पनि अन्य विषय छलफलमा नै रहेको बताए। 

उक्त खण्डमा हालसम्म ३७ दशमलव ५ प्रतिशत मात्र काम भएको छ। दरैका अनुसार नौ किलोमिटरभन्दा केही बढी कालोपत्रे गरिसकिएको छ। धादिङको चरौदी क्षेत्रमा कालोपत्रे भइरहेको छ। फिस्लिङलगायत क्षेत्रमा कालोपत्रेको तयारी गरिएको छ।
    
नाली, बेरियर, पुललगायत सडकका विभिन्न क्षेत्रका काम भइरहेका छन्। दरैका अनुसार दैनिक १५० हाराहारी मजदुरले काम गरिरहेका छन्। आयोजनाका तर्फबाट आवश्यक सहजीकरण गरेर थप भएको समयमा सक्ने गरी कामलाई तीव्रता दिन निर्माण कम्पनीलाई भनिएको उनले बताए। 
    
सो खण्डमा ३८ दशमलव ८६ किलोमिटर सडक पर्दछ। यस खण्डमा दुई दशमलव दुई किमी छ लेनको बन्नेछ। जुन मलेखु, बेनीघाट र मुग्लिङ खण्डमा पर्दछ। सात दशमलव दुई किमी सडक चार लेन हुनेछ।

चार लेन रमाइलो डाँडा, कुरिनटार, फिस्लिङ, चुम्लिङ, मझीमटार, चरौँदी र विशालटार क्षेत्रमा पर्ने जनाउँदै दरैले उकालो-ओरालो खण्डमा तीन लेनको ‘क्लाइम्बिङ’ मार्ग बनाइने बताए। उनका अनुसार ‘क्लाइम्बिङ’ मार्ग दुई दशमलव तीन किमीको हुनेछ भने बाँकी सडक दुई लेनको हुनेछ।
    
शर्मा–जेडआइसिजीले चार अर्ब ८० करोड ५९ लाखमा यस खण्ड स्तरोन्नतिको ठेक्का लिएको हो । सडकका विभिन्न क्षेत्रमा कालोपत्रेसँगै नाला बनाउने, पहिरो रोकथामका लागि संरचना निर्माण, भित्तो काट्ने, पर्खाल लगाउने, सडक सुरक्षालगायत काम बाँकी छ।

यो सडक विश्व बैंकको सहयोगमा बनाउन लागिएको हो। 

काठमाडौँ प्रवेश गर्ने र बाहिरिने मुख्य नाकाका रूपमा यो खण्ड रहेको छ।