घाइते म्याक्सवेलको मुस्किल खेललाई चामत्कारिक रूपमा जिताएपछि...

घाइते म्याक्सवेलको मुस्किल खेललाई चामत्कारिक रूपमा जिताएपछि...

काठमाडौं : ग्लेन म्याक्सवेलको अविश्वसनीय दोहोरो शतकमा अष्ट्रेलियाले भारतमा जारी आईसीसी एकदिवसीय विश्वकपमा अफगानिस्तानलाई तीन विकेटले हराएको छ।

जितसँगै अष्ट्रेलिया ८ खेलमा १२ अंकका साथ सेमिफाइनलमा पुगेको छ।

जितको लागि २ सय ९२ रनको विजयी लक्ष्य पछ्याएको अष्ट्रेलियाले ४६.५ ओभरमा ७ विकेट गुमाउँदै पूरा गर्यो।

अष्ट्रेलियाको जितमा ग्लेन म्याक्सवेल १ सय २८ बलमा २१ चौका र १० छक्कासहित २ सय १ रनमा अविजित रहे।

म्याक्सवेल घाइते हुँदा सिंगल लिन नसके पनि चौका र छक्का हान्दै एक रुपमा खेल जिताएका हुन्। एक समय ९१ रनमा सात विकेट गुमाएको अष्ट्रेलियालाई म्याक्सवेलले अविश्वसनीय इनिङ खेलेका थिए।

आठौं विकेटका लागि ग्लेन म्याक्सवेल र प्याट कमिन्सले १ सय ७० बलमा २ सय २ रनको अविजित साझेदारी गरे। प्याट कमिन्स ६८ बलमा १२ रनमा अविजित रहे।

ओपनर ट्रविस हेड नविन उल हकको दोस्रो ओभरको दोस्रो बलमै एज लागेर शून्यमा क्याच आउट भएका थिए। दोस्रो विकेटका लागि डेविड वार्नर र मिचेल मार्शले ३९ रनको साझेदारी गरेका थिए।

मार्श नविन उल हकको बलमा २४ रनमा एलबीडब्लू आउट भए। मार्शले ११ बलमा २ चौका र २ छक्का हानेका थिए। त्यो समय अष्ट्रेलिया ५.४ ओभरमा ४३-२ को अवस्थामा थियो।

नवौं ओभरको पहिलो बलमा ओमरजाईले वार्नरलाई १८ रनमा बोल्ड गरे। लगत्तै अर्को बलमा विकेटकिपर जोश इंग्लिस क्याच आउट भएपछि अष्ट्रेलिया ८.२ ओभरमा ४९-४ को अवस्थामा पुगेको थियो।

१५ औं ओभरको पहिलो बलमा मार्नस लाबुसेन १४ रनमा रन आउट भए। मार्कस स्टोइनिस ६ र मिचेल स्टार्क ३ रनमा राशिद खानको बलमा आउट भएपछि अष्ट्रेलिया १८.३ ओभरमा ९१-७ को अवस्थामा पुगेको थियो।

त्यसपछि ग्लेन म्याक्सवेल र प्याट कमिन्सको जोडीले अविश्वसनीय साझेदारीमा जित दिलाएका थिए। अफगानिस्तानका राशिद खान, नविन उल हक र आजमतुल्लाह ओमरजाईले दुई-दुई विकेट लिए।

त्यसअघि वानखडे स्टेडियम मुम्बईमा टस जितेर पहिला ब्याटिङ रोजेको अफगानिस्तानले निर्धारित ५० ओभरमा ५ विकेट गुमाउँदै २ सय ९१ रन बनाएको थियो।

अफगानिस्तानका इब्राहिम जद्रान १ सय ४३ बलमा ८ चौका र ३ छक्कासहित सर्वाधिक १ सय २९ रनमा नट आउट रहे। जद्रान विश्वकपमा शतक हान्ने पहिलो अफगानी ब्याटर बनेका थिए।

जद्रान बाहेक अन्य ब्याटरले भने ठूलो इनिङ खेल्न सकेनन्। ओपनर रहमानउल्लाह गुरबाज २५ बलमा २ चौकासहित २२, रहमात शाह ३०, कप्तान हश्मातुल्लाह शाहिदी २६ र आजमतुल्लाह ओमरजाई २२ रनमा आउट भए।

ओमरजाईले १८ बलमा १ चौका र २ छक्का प्रहार गरेका थिए। राशिद खान १८ बलमा २ चौका र ३ छक्कासहित ३५ रनमा नट आउट रहे। छैटौं विकेटका लागि राशिद खान र जद्रानले २८ बलमा ५८ रनको महत्वपूर्ण साझेदारी गरेका थिए।

अष्ट्रेलिया मिचेल स्टार्कले ९ ओभरमा ७० रन खर्चिदा १ विकेट लिए। जोश हेजलवुडले ९ ओभरमा ३९ रन खर्चेर २ विकेट लिए।

ग्लेन म्याक्सवेल र एडम जाम्पाले एक एक विकेट लिए। अष्टेलिया ८ खेलमा १२ अंकका साथ सेमिफाइनलमा स्थान पक्का गरेको हो।

भारत ८ खेलमा १६ अंकका साथ शीर्षस्थानमा छ। दक्षिण अफ्रिका ८ खेलमा १२ अंकका साथ दोस्रो स्थानमा छ।

अष्ट्रेलिया ८ खेलमा १२ अंकका साथ तेस्रो स्थानमा छ। यी तीन टोली सेमिफाइनलमा पुगेका छन्।

अब न्युजिल्यान्ड, पाकिस्तान र अफगानिस्तान मध्य एक टोली १० अंकका साथ सेमिफाइनल खेल्नेछन्। यी तीन टोलीको समान ८ अंक छ।

नेटरनरेटका कारण न्युजिल्यान्ड चौथो, पाकिस्तान पाँचौं र अफगानिस्तान छैटौं स्थानमा छ।

अफगानिस्तानले अन्तिम खेल दक्षिण अफ्रिकासँग, पाकिस्तानले इंग्ल्यान्ड र न्युजिल्यान्डले श्रीलंकासँग खेल्नेछन्।

२२ कात्तिक, २०८०, ०७:२०:५७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।