उकेरा न्युज

३९ औं बिपी स्मृति दिवस : सत्तामा पुगेपछि कांग्रेसले बिर्सियो बिपीलाई 

बिपीको सम्झनामा न केन्द्रले कुनै कार्यक्रम गर्याे न त पार्टी सभापति देउवाले विज्ञप्ति निकाले 


काठमाडौं : आज बिपी कोइरालाको ३९ औं स्मृति दिवस। विभिन्न माध्यमबाट प्रथम जननिर्वाचित प्रधानमन्त्रीसमेत रहेका बिपीको राजनीतिक र साहित्यक जीवनमाथि चिन्तन–मनन भइरहेको छ। 

कोरोना भाइरस (कोभिड–१९) संक्रमणको कहरका कारण ठूला औपचारिक कार्यक्रममार्फत उनलाई सम्झने अवस्था रहेन। भर्चुअल माध्यमबाटै भए पनि उनको योगदानमाथि चर्चा–परिचर्चा भइरहेका छन्। तर, उनले स्थापना गरेको पार्टी नेपाली कांग्रेसले सत्तामा पुगेपछि बिपीलाई सम्झने फुर्सद पाएन। 

औपचारिकरूपमा मात्र पनि पार्टी केन्द्रको तर्फबाट भर्चुअल कार्यक्रमसमेत राखिएन। त्यस्तै, प्रधानमन्त्रीसमेत रहेका शेरबहादुर देउवाले सामान्य विज्ञप्तिसमेत निकालेर बिपीलाई सम्झने फुर्सद पाएनन्। 

पार्टी मुख्य सचिव कृष्णप्रसाद पौडेलका अनुसार पार्टीको तर्फबाट बिपीको सम्झनामा दुई वटा कार्यक्रम तय भएका थिए। 

‘पहिलो नम्बरमा केन्द्रीय कार्यालयले ७७ जिल्लालाई स्मृति दिवस मनाउन सर्कुलर गरेको थियो। दोस्रो, कांग्रेसको सूचना र प्रचार विभागले गरेको कार्यक्रममा ७७ वटै जिल्लाका पार्टी प्रतिनिधि जोडिएर पार्टी सभापतिलगायत नेताको उपस्थितिमा कार्यक्रम गर्याे,’ उनले उकेरासँग भने।

त्यसबाहेक पार्टी केन्द्रीय कार्यालयले कुनै कार्यक्रम आयोजना नगरेको उनले बताए। 

बिपीको स्मृतिमा कांग्रेस सभापति देउवा र पार्टीका तर्फबाट कुनै विज्ञप्तिसमेत जारी गरेका देखिएन। यसबारे प्रश्न गर्दा मुख्य सचिव पौडेलले विज्ञप्ति ननिकालिएको पुष्टि गरे। 

सभापति देउवाले सूचना र प्रचार विभागले जुममार्फत गरेको कार्यक्रममा नै आफ्नो भनाइ राखिसकेकाले विज्ञप्तिको आवश्यकता नपर्ने जिकिर गरे। 

‘विज्ञप्ति ननिकाले पनि सभापतिज्यूले प्रचार विभागले गरेको कार्यक्रममा आफ्नो भनाइ राखिसक्नुभएको छ। उहाँले त्यहीँ बोल्नुभएको छ। भाषण नै गर्नुभएको छ नि !’ 

व्यस्तताको कारण देखाउँदै जुममार्फत साढे २ मिनेट मात्र सम्बोधन गरेका देउवाले बिपीलाई ‘भर्सटायल’ व्यक्तिको रूपमा प्रस्तुत गरे। उनले बिपीको राजनीतिक र साहित्यिक योगदान अतुलनीय रहेको चर्चा गरे। 

‘सानो देशका ठूला मान्छे भनेर भन्ने गरेको छु मैले, यस्ता व्यक्तिको बारेमा जुममार्फत भए पनि बोल्ने अवसर पाएँ। बिपीलाई सम्झन यति कुरा गरेर साध्य छैन कहाँदेखि सुरु गर्ने कहाँ लगेर अन्त्य गर्ने ?’ देउवाले सम्बोधनका क्रममा भनेका थिए। 

त्यसबाहेक सभापति देउवाले दिउँसो १ः५० बजे मात्र आफ्नो फेसबुक पेजमार्फत बिपीलाई सम्झिए। उनले स्टाटसमा बिपी आफ्नो राजनीतिक गुरु मात्रै नभई अभिभावकसमेत रहेको र आज चार दशकअघि बिपीसँगको सामीप्यतामा फर्किएको महसुस गरेको उल्लेख गरे। 

देउवाको स्टाटसमा भनिएको छ, ‘बिपी कोइराला मेरो राजनीतिक गुरु मात्रै होइन, मेरो अभिभावक पनि हुनुहुन्थ्यो। उहाँको प्रेरणाले नै हामी लोकतन्त्र प्राप्तिको आन्दोलनमा होमिएका थियौं। आज उहाँको ३९ औ स्मृति दिवस। आज मेरो स्मृति चार दशकअघि उहाँसँगको सामीप्यतामा फर्किएको महसुस गरेको छु। तपाईंको मार्गदर्शन जीवनभर मेरो प्रेरणा हुनेछ। श्रद्धेय नेता बिपी कोइरालाप्रति हार्दिक श्रदासुमन व्यक्त गर्दछु।’ 
 

यो खबर पढेर तपाईलाई कस्तो महसुस भयो ?

सम्बन्धित समाचार

हत्याको कार्यविधि सङ्गठित, पक्राउ परेका आरोपित 'भुराभुरी'

प्रहरीको दाबीअनुसार पक्राउ परेकाहरू हत्याको योजनाकार, हतियार व्यवस्थापक अनि लाल मोहम्मदको निगरानी गर्ने भूमिकामा संलग्न देखिएका छन्। पर्साका २१ वर्षीय मोहरम मियाँ हत्याको योजनाकार र....

लाल मोहम्मदको हत्या आरोपमा प्रहरीले १९ वर्षदेखि २१ वर्षका तीन जना सार्वजनिक गर्‍यो

पक्राउ पर्ने २ जना वीरगन्जका हुन् भने एक जना मकवानपुरकी हुन्। प्रहरीले शुक्रवार पर्साका २१ वर्षीय मोहरम मियाँ , रेहान मियाँ र १९ वर्षकी स्वस्तिका....

बियरको बोत्तलले हानेर आफ्नै छोराको हत्या गरेको अभियोगमा पक्राउ   

लौरंलालले बुधबार फुटेको बियरको बोतलले पेटमा प्रहार गर्दा गम्भीर घाइते भएका विवेकको उपचारको लागि अस्पतालतर्फ लैजाने क्रममा बाटोमै मृत्यु भएको हो। घटनापश्चात फरार रहेका उनलाई....

बागमती प्रदेशका पाँच जिल्लाका यी सडकमा टाइम कार्ड लागू (सूचीसहित)

सिन्धुली जिल्ला हुँदै जाने वीपी राजमार्गस्थित भिमानदेखि नेपालथोक दुम्जासम्ममा पहिलेदेखिनै टाइमकार्ड लागू भएकोमा चाडपर्वलाई लक्षित गरी थप मकवानपुर, चितवन, धादिङ र काभ्रे जिल्लाका प्रमुख राजमार्गमा....

कोरोना अपडेट : ६३ थपिए, १०३ संक्रमणमुक्त

पछिल्लो २४ घण्टामा गरिएको २ हजार ५३५ नमूना परीक्षणमा ६३ जनामा संक्रमण देखिएको स्वास्थ्य तथा जनसंख्या मन्त्रालयले जनाएको छ। यस अवधिमा १ सय ३ जना....