प्रदेश

'गुरु' मनाङे मनाउन पोखरा पुगेका 'चेला' गणेश प्रहरी नियन्त्रणमा

उकेरा संवाददाता


कास्की :  गण्डकी प्रदेशका स्वतन्त्र सांसद राजीव गुरुङ उर्फ दीपक मनाङेलाई मनाउन पोखरा पुगेका नेपाली काँग्रेस निकट गणेश लामालाई कास्की प्रहरीले नियन्त्रणमा लिएको छ। निषेधाज्ञाको बेलामा पोखरा पुगेका उनलाई कास्की प्रहरीले क्याटवाक रेस्टुरेन्टबाट नियन्त्रणमा लिएको हो।

गण्डकीमा सत्ता परिवर्तनको खेल सुरु भएपछि अहिले मनाङेको मत निर्णायक बनेको छ। गण्डकी प्रदेशका मुख्यमन्त्री पृथ्वी सुब्बा गुरुङले बिहीबार विश्वासको मत नपाएपछि नयाँ सरकारको बाटो खुलेको छ। तर विपक्षीसँग बहुमतका लागि एक जना सांसद पुगेको छैन।

मनाङेले बुधवार जसको पक्षमा ३० मत पुग्छ त्यतै लाग्ने बताएपछि उनी एकाएक सम्पर्कविहीन भएका थिए। उनी बुधवार विश्वासको मतमा लागि भएको मतदानमा सहभागी समेत भएनन्। त्यही बेला लामा पोखरा पुगेको सूचना आएपछि प्रहरी उनको खोजीमा लागेको थियो।

स्रोतका अनुसार मनाङे सम्पर्कहीन भनिए पनि पोखरा बुटिक होटेलमा छन्। लामा त्यही पुगेका थिए। प्रहरीले आफूलाई खोजिरहेको सूचना आएपछि उनी त्यहाँबाट क्याटवाक रेस्टुरेन्ट गएपछि प्रहरीले घेरा हालेर उनलाई नियन्त्रणमा लिएको थियो।

उनलाई प्रहरीले इलाका प्रहरी कार्यालय बैदाममा राखेको छ। उनी कुन आरोपमा पक्राउ परेको हो सो भने खुलाएका छैनन्।

गुरु, चेला नै राजनीतिमा

आपराधिक गतिविधिबाट पहिचान बनाएका मनाङे र लामा अपराधको दुनियाँमा गुरु चेलाको रूपमा परिचित छन्। लामा कुनै समय मनाङे समूहमा सक्रिय थिए। उनले मनाङेको ठमेल क्षेत्रमा फैलिएको जालोको संरक्षण गर्थे। मनाङे सार्वजनिक अपराधको आरोपमा कारागार परेपछि उनको रात्रिकालीन व्यवसायको हर्ताकर्ता बनेको बेलामा उनले ठमेल क्षेत्रमा आफ्नो प्रभाव विस्तार गरेका थिए।

पछि लामाले काभ्रेका आफ्ना समर्थक युवाहरू मिलाएर काभ्रेली समूह बनाएर मनाङेबाट छुट्टिएका थिए। पछि लामा निर्माण सामाग्री र होटेल व्यवसायमा सक्रिय भएका थिए।

राप्रपा काँग्रेस हुँदै मनाङे स्वतन्त्र बस्दा लामा भने विजयकुमार गच्छदारको संरक्षणमा राजनीतिमा सक्रिय भइसकेका थिए। गच्छदारको समूह काँग्रेसमा आएपछि उनी पनि काँग्रेसमा सहभागी भए। मनाङे मनाङमा प्रदेश सभा सदस्यको निर्वाचनमा उम्मेदवार बन्दा लामा काभ्रेमा प्रदेश सभाको उम्मेदवार बनेका थिए।

एमालेले साथ दिँदा मनाङे प्रदेश माननियहुँदै अहिले प्रदेश सरकार बनाउने कि मध्यावधिमा जाने निर्णायक बन्दा लामा भने पराजित भएर निर्वाचनको पर्खाइमा छन्।

यो खबर पढेर तपाईलाई कस्तो महसुस भयो ?

सम्बन्धित समाचार

मनाङेबारे निवर्तमान मुख्यमन्त्री गुरुङको टिप्पणी : सबै डाँकुहरू वाल्मीकि नहुँदा रहेछन्

आइतबार आफ्नै निवासमा पत्रकारसँग कुरा गर्दै उनले मनाङेलाई आफूले चुनाव जिताएर सांसद बनाएको, प्रदेशसभा सदस्यको सपथ दिलाउन भूमिका खेलेको दावी गर्दै पछि विपक्षी गठबन्धनमा लागेकोमा चित्त दुखाए।....

प्रदेश १ को नीति तथा कार्यक्रम बहुमतले पारित

शुक्रबार र शनिबार नीति तथा कार्यक्रममाथि बहस भएसँगै आइतबार प्रदेशसभाबाट नीति तथा कार्यक्रम पारित गरिएको हो।  छलफलको क्रममा ३२ जना सांसदले राखेको जिज्ञासाको जवाफ दिँदै....

गोड्से बन्छु भन्ने प्रदेश सांसदविरुद्ध दुरुत्साहन गरेको जाहेरी दर्ता, तर सहज छैन अनुसन्धान प्रक्रिया

जिल्ला प्रहरी कार्यालय मकवानपुरमा आइतबार युवा सङ्घ मकवानपुरका सदस्य नवीन काफ्लेले मुलुकी अपराध संहिता अनुसार दुरुत्साहनको जाहेरी दिएका हुन्। 'प्रदेश सभामा बोलेको विषयलाई आधार बनाएर....

कर्णाली प्रदेश : बजेटमा आफ्ना १९ बुँदे कार्यक्रम समेट्न एमाले संसदीय दलको माग

मुख्यमन्त्री शाहीलाई १९ बुँदे मागपत्र बुझाउँदै एमाले प्रदेश संसदीय दलका नेता यामलाल कँडेलको नेतृत्वकाे टोलीले आफ्ना कार्यक्रम बजेटमा समेट्न माग गरेको हो।  एमालेले प्रदेश रंगशाला निर्माणदेखि कोरोना महामारी....

पत्रकारलाई जेल हाल्ने कानुन ल्याउँदै लुम्बिनी सरकार

प्रदेश सरकारले सञ्चार माध्यमको नवीकरण नगर्न सक्ने लगायतका विवादित प्रावधान राखेर प्रदेश सभामा विधेयक दर्ता गरेको छ। जेठ २४ गते प्रदेश सभामा दर्ता भएको विधेयकमा....