छिन्नमस्ता गाउँपालिकाले किसानको विद्युत् महसुल तिरिदिने

राजविराज : सप्तरीको छिन्नमस्ता गाउँपालिकाले पालिकाभित्रका किसानको सिंचाइको विद्युत् महसुल तिरिदिने भएको छ।

कृषि उत्पादन बढाउनका लागि कृषि विद्युतीकरण कार्यक्रमअन्तर्गत खेत खेतमा गाउँपालिकाले सिंचाइ सुविधा पनि पुर्याउने निर्णय गरेको हो।

४० हजार जनसंख्या रहेको पालिकामा ९५ प्रतिशत नागरिक कृषि पेसामा आबद्ध छन्। तर, सिंचाइको अन्य विकल्प नहुँदा किसानले डिजेलबाट चल्ने पम्पसेटबाट खेती सिँचाइ गर्दै आएका थिए।

यसरी सिंचाइ गर्दा महँगो पर्न जाने किसानको गुनासो रहँदै आएको थियो।

कृषि विद्युतीकरणबाट सिँचाइ गर्दा कम लागतमा धेरै सिंचाइ गर्न सकिने भएकाले यो अवधारण ल्याएको गाउँपालिका अध्यक्ष बिद्यानन्द चौधरीले बताए।

गएको असार ७ गते सम्पन्न १०औं गाउँसभा बैठकबाट किसानले खेत सिँचाइ गर्दा उठेको महसुल पचास प्रतिशत गाउँपालिकाले तिरिदिने निर्णय गरिएको अध्यक्ष चौधरीले बताए।

‘यो निर्णयबाट सम्पूर्ण किसान लाभान्वित हुने अपेक्षा गरेका छौँ,’ अध्यक्ष चौधरी भने, ‘कृषि विद्युतीकरणबाट सिंचाइ गर्दा कम लागतमा धेरै सिँचाइ गर्न सकिने भएकाले साथै खेतिप्रति किसानको आकर्षणसमेत बढ्नेछ।’

२९ चैत, २०८०, १२:३३:१२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।